હિંમતનગરના કાંકણોલમાં બીએપીએસ સ્વામિનારાયણ મંદિરમાં આજે મધ્યપ્રદેશના કેબિનેટ મંત્રીશ્રી કૈલાશ વિજય વર્ગીયજીની ઉપસ્થિતિમાં સાબરકાંઠા જિલ્લા ખેડૂતોનું સંમેલન યોજવામાં આવ્યું હતું. ભારતીય જનતા પાર્ટી સાબરકાંઠા જિલ્લા લોકસભા બેઠકના પ્રચારનો પ્રારંભ કર્યો હતો. ખેડૂત સંમેલનમાં મંત્રીની ઉપસ્થિતિમાં સૂચન પેટીમાં ખેડૂતોએ સૂચનો રજૂ કર્યા હતા.
આગામી લોકસભાની ચૂંટણીમાં સરકાર ભારતીય જનતા પાર્ટી ની સરકાર બનવાની જ છે તેઓ વિશ્વાસ વ્યક્ત કરી મંત્રીશ્રીએ સરકાર કિસાનો માટે શું કરી શકાય તે માટેના સૂચનો સૂચન પેટી દ્વારા મેળવ્યા હતા. જેમાં કિસાનોએ તેમના સૂચનો પેટીમાં રજૂ કર્યા હતા. કિસાન સંમેલનમાં સાંસદશ્રી દીપસિંહ રાઠોડ, જિલ્લા ભાજપ પ્રમુખ કનુભાઈ પટેલ, હિંમતનગરના ધારાસભ્યશ્રી વી. ડી .ઝાલા, પ્રાંતિજના ધારાસભ્યશ્રી ગજેન્દ્રસિંહ પરમાર, પ્રદેશ ઉપાધ્યક્ષ કૌશલ્ય કુંવરબા પરમાર, સાબરડેરીના ચેરમેન શામળભાઈ પટેલ, માર્કેટયાર્ડના ચેરમેન જેઠાભાઈ પટેલ, વાઇસ ચેરમેન રાજુભાઈ પંચાલ સહિત પાર્ટીના અગ્રણીઓ હોદેદારશ્રીઓ કાર્યકર્તાઓ અને કિસાન આગેવાનો અને ખેડૂતો મોટી સંખ્યામાં ઉપસ્થિત રહ્યા હતા.
વડાપ્રધાન શ્રી નેરન્દ્રભાઇ મોદીએ શક્તિપીઠ અંબાજી ખાતે મા અંબા સમક્ષ શિશ ઝુકાવી ભક્તિભાવપૂર્વક માતાજીના દર્શન અને પૂજા અર્ચના કર્યા ******* ગુજરાતના પનોતા પુત્ર અને દેશના વડાપ્રધાનશ્રીની એક ઝલક જોવા માટે ઉમટેલી વિશાળ જનમેદનીએ વડાપ્રધાનશ્રીનું ઉમળકાભેર સ્વાગત કર્યુ
ગુજરાતની બે દિવસની મુલાકાતે પધારેલા વડાપ્રધાનશ્રી નેરન્દ્રભાઇ મોદીએ શક્તિપીઠ અંબાજી ખાતે મા અંબા સમક્ષ શિશ ઝુકાવી ભક્તિભાવપૂર્વક માતાજીના દર્શન અને પૂજા અર્ચના કર્યા હતા.
મા અંબા ના ઉપાસક અને દેશના લોકપ્રિય વડાપ્રધાન શ્રી નરેન્દ્રભાઈ મોદીએ આજે સવારે ચીખલા હેલીપેડ પર ઉતરાણ કરી અંબાજી મંદિર સુધી બાયરોડ આવતા આ રૂટ પર ગુજરાતના પનોતા પુત્ર અને દેશના વડાપ્રધાનશ્રીની એક ઝલક જોવા માટે ઉમટેલી વિશાળ જનમેદનીએ વડાપ્રધાનશ્રીનું ઉમળકાભેર સ્વાગત કર્યુ હતું. આ પ્રસંગે વડાપ્રધાનશ્રીએ પણ લોકોનું અભિવાદન ઝીલ્યું હતું.
અંબાજી મંદિરના મુખ્ય પ્રવેશદ્વાર એવા શક્તિદ્વાર પાસે વડાપ્રધાનશ્રી અને મુખ્યમંત્રીશ્રીનું બનાસકાંઠા જિલ્લા વહીવટી તંત્ર અને સંગઠનના હોદ્દેદારો દ્વારા ભાવભર્યું સ્વાગત કરવામાં આવ્યું હતું.
અત્રે ઉલ્લેખનીય છે કે, વડાપ્રધાનશ્રી નરેન્દ્રભાઈ મોદીના આગમનને લઈ અંબાજીની સ્વચ્છતા સાથે મંદિરના ચાચર ચોકની સુંદર સજાવટ કરવામાં આવી છે તથા મંદિરને અલગ અલગ પ્રકારના રંગ બેરંગી ફુલોથી શણગારીને સુશોભિત કરવામાં આવ્યું છે. મંદિરના ચાચર ચોકમાં ભજન મંડળી અને સાંસ્કૃતિક કાર્યક્રમોથી મંદિરમાં ભક્તિમય માહોલ સર્જાયો છે.
આ પ્રસંગે વિધાનસભાના અધ્યક્ષશ્રી શંકરભાઇ ચૌધરી, મુખ્ય મંત્રીશ્રી ભૂપેન્દ્રભાઈ પટેલ, ગૃહ રાજ્ય મંત્રીશ્રી હર્ષભાઈ સંઘવી,રાજ્ય સભા સાંસદશ્રી બાબુભાઇ દેસાઈ, ધારાસભ્યો સર્વશ્રી કેશાજી ચૌહાણ, શ્રી પ્રવિણભાઈ માળી, શ્રી અનિકેતભાઈ ઠાકર, શ્રી માવજીભાઈ દેસાઈ, મુખ્ય સચિવશ્રી રાજકુમાર, ડી.જી.પી. શ્રી વિકાસ સહાય, ગુજરાત પવિત્ર યાત્રાધામ વિકાસ બોર્ડના સચિવશ્રી આર. આર. રાવલ, શ્રી આરાસુરી અંબાજી માતા દેવસ્થાન ટ્રસ્ટના ચેરમેન કમ બનાસકાંઠા જિલ્લા કલેક્ટરશ્રી વરૂણકુમાર બરનવાલ, પોલીસ અધિક્ષકશ્રી અક્ષયરાજ મકવાણા, પૂર્વ મંત્રીશ્રી અને સંગઠનના પ્રમુખશ્રી કીર્તિસિંહ વાઘેલા સહિત પદાધિકારીઓ- અધિકારીઓ અને વિશાળ સંખ્યામાં માઇભક્તો ઉપસ્થિત રહ્યા હતા.
________________________________
અંબાજીનું પ્રવાસ પૂરો કરીને મોદી મહેસાણાના ડભોડા ખાતે આવ્યા હતા અને ત્યારબાદ ત્યાં ઉપસ્થિત વિશાળ જનમેદની ને પણ સંબોધિત કરી હતી.
ભારતના સામર્થ્યનો વિશ્વને પરિચય મળી રહ્યો છે: ભારતના વિકાસની ચર્ચા પૂરી દુનિયામાં થઈ રહી છે તેના મૂળમાં પ્રત્યેક ભારતીયનો વિકાસ પુરુષાર્થ છે ¤ “એક સે બઢકર એક” આધુનિક ઇન્ફ્રાસ્ટ્રક્ચરના નિર્માણથી ભારતદેશ વિકાસ પથ પર તીવ્ર ગતિથી આગળ વધી રહ્યો છે: સરકાર જે સંકલ્પ લે છે તે અવશ્ય પૂર્ણ કરે છે ¤ પૂર્ણ બહુમતીવાળી સ્થિર સરકારથી ગુજરાતે વિકાસના નવા આયામો હાંસલ કર્યા, હવે દેશમાં પૂર્ણ બહુમતવાળી સ્થિર સરકારના કારણે દેશનો વૈશ્વિક વિકાસ થઈ રહ્યો છ ¤ સરકારે મહિલાશક્તિના નેતૃત્વ અને માતૃશક્તિના સામર્થ્યને જોડીને વિકાસને નૂતન ગતિ આપી છે ¤ ગ્રીન હાઈડ્રોજન ક્ષેત્રે દેશ આગળ વધી રહ્યો છે જેમાં ઉત્તર ગુજરાતનું શ્રેષ્ઠ યોગદાન હશે ¤ વિકાસ પ્રકલ્પોનાં કારણે ઉત્તર ગુજરાતના વિકાસને નવી દિશા મળશે ¤ વર્ષ 2047 માં આઝાદીના શતાબ્દી વર્ષ સુધીમાં વિકસિત ભારતના નિર્માણ માટે પૂર્ણ સમર્પણભાવથી, બમણી તાકાતથી આગળ વધવાના જનતા જનાર્દન પાસે આશીર્વાદ માંગતા પ્રધાનમંત્રીશ્રી: તમારા આશીર્વાદ જ મારી ઉર્જા ¤ દેશના પ્રધાનમંત્રી શ્રી નરેન્દ્રભાઈએ દિવાળી પહેલા દિવાળીની મોટી ભેટ ગુજરાતને આપી છે- મુખ્યમંત્રીશ્રી
******
ભારતના પ્રધાનમંત્રી શ્રી નરેન્દ્રભાઈ મોદીએ મહેસાણા જિલ્લાના ડભોડા ખાતેથી ₹5,950 કરોડના વિવિધ વિકાસ પ્રકલ્પોના લોકાર્પણ ખાતમુહૂર્ત કરતા જણાવ્યું હતું કે આજે ભારતના શક્તિ સામર્થ્યનો વિશ્વને પરિચય મળી રહ્યો છે. આજે ભારતના વિકાસની ચર્ચા પૂરી દુનિયામાં થઈ રહી છે તેના મૂળમાં પ્રત્યેક ભારતીયનો વિકાસ પુરુષાર્થ રહેલો છે. તેમણે જણાવ્યું હતું કે દુનિયાનો કોઈ દેશ નથી પહોંચ્યો એવી જગ્યાએ ચંદ્રની ધરતી પર પહોંચીને ભારતે પોતાની શક્તિનો પરિચય વિશ્વને આપ્યો છે. જી-20 નું યજમાનપદ સ્વીકાર્યા બાદ ભારતભરમાં એની ચર્ચા થઈ એટલું જ નહીં વૈશ્વિક પ્રતિનિધિઓએ ભારતના વૈભવ-વારસાનો તેમજ દેશની ક્ષમતા-સામર્થ્યનો પરિચય મેળવ્યો છે.
એક સે બઢકર એક આધુનિક ઈન્ફ્રાસ્ટ્રક્ચરના નિર્માણથી ભારત વિકાસ પથ પર વધુ તીવ્ર ગતિથી આગળ વધી રહ્યો છે. સરકાર જે સંકલ્પ લે છે તે અવશ્ય પૂર્ણ કરે છે તેમ સ્પષ્ટ જણાવતા પ્રધાનમંત્રીશ્રી એ ઉમેર્યું હતું કે કેન્દ્ર અને રાજ્ય સરકારે જનજનની સુખાકારી માટે માળખાકીય સુવિધાના નિર્માણ માટે મોટું અભિયાન ઉપાડ્યું છે.
પ્રધાનમંત્રી શ્રી નરેન્દ્ર ભાઈ મોદીએ ઉત્તર ગુજરાતની મુલાકાતને પરિવારજનોના દર્શનનો અને વતનની માટીનું ઋણ ચૂકવવાના અવસર રૂપ ગણાવી જણાવ્યું હતું કે આજે જે વિકાસ પ્રકલ્પોના ખાતમુહૂર્ત-લોકાર્પણ થઈ રહ્યા છે તે આ વિસ્તારના વિકાસને નવી ઊંચાઈ પ્રદાન કરશે. તેમણે જણાવ્યું હતું કે ગુજરાત સરકારે ઉત્તર ગુજરાતની કાયાકલ્પ માટે અનેકવિધ વિકાસ પ્રકલ્પોને સાકાર કર્યા છે. અગાઉ ઉદ્યોગ અને રોજગાર વિહોણા પ્રદેશની ઓળખ ધરાવતા ઉત્તર ગુજરાતનો પ્રદેશ આજે ઉદ્યોગ- રોજગારથી ધમધમતો બન્યો છે. અહીંના ડેરી ક્ષેત્રના વિકાસથી માતૃશક્તિના સહયોગ અને સહકારથી સમૃદ્ધિ દ્વારા દેશને પ્રેરણા આપી છે.
શ્રેષ્ઠ વિકાસના મૂળમાં સ્થિર સરકાર હોવાનું જણાવતા પ્રધાનમંત્રીશ્રીએ ઉમેર્યું હતું કે પૂર્ણ બહુમતી વાળી સ્થિર સરકારથી ગુજરાતે વિકાસના નવા આયામો હાંસલ કર્યા છે. હવે દેશમાં સ્થિર અને પૂર્ણ બહુમતી વાળી સરકારના કારણે આજે ભારતનો વૈશ્વિક વિકાસ થઈ રહ્યો છે.
પ્રધાનમંત્રીશ્રીએ આઝાદીના જંગમાં આદિવાસી નેતૃત્વ પૂરું પાડનારા શ્રી ગોવિંદ ગુરુની પુણ્યતિથિ ના અવસરે તેમને ભાવભરી શ્રદ્ધાંજલિ પાઠવી હતી. તેમજ 31 ઓક્ટોબર સરદાર પટેલ જયંતિના અવસરે તેમણે સરદાર પટેલને શ્રદ્ધાંજલિ પાઠવી જણાવ્યું હતું કે વિશ્વની સૌથી ઊંચી પ્રતિમા સ્ટેચ્યુ ઓફ યુનિટીના નિર્માણ દ્વારા આવનારી પેઢી ઊંચા મસ્તકે સરદાર પટેલને શ્રદ્ધાંજલિ પાઠવી તેમના જીવન કવન પરથી રાષ્ટ્રભક્તિ અને એકતાની પ્રેરણા મેળવશે. પ્રધાનમંત્રીશ્રીએ મા અંબાના ચરણોમાં આશીર્વાદ મેળવવાનો આનંદ વ્યક્ત કરી અંબાજી યાત્રાધામના વિકાસ અને રાજ્યભરમાં સ્વચ્છતાના અભિયાન દ્વારા પ્રેરક કાર્ય કરવા બદલ રાજ્ય સરકાર અને રાજ્યના નાગરિકોને અભિનંદન પણ પાઠવ્યા હતા.
ગુજરાતના શ્રેષ્ઠ અને ઝડપી વિકાસ પાછળ બે દાયકાનો પુરુષાર્થ છે તેમ જણાવતા પ્રધાનમંત્રીશ્રી એ ઉમેર્યું હતું કે આજના વિકાસ પ્રકલ્પો ઉત્તર ગુજરાતની જાહોજલાલીને નવા શિખર પર પહોંચાડશે. કેન્દ્ર અને રાજ્ય સરકારે આ પ્રદેશના જન-જનના વિકાસ માટે સંકલ્પ લીધો છે અને આ સંકલ્પની સિદ્ધિ માટે કનેક્ટિવિટીના નિર્માણ પર જોર આપ્યું છે. તેમણે જણાવ્યું હતું કે ડેડીકેટેડ ફ્રેટ કોરિડોરથી ગુજરાતના બંદરો સુધી રેલ્વે લાઈન પહોંચશે અને માલ પરિવહન ક્ષેત્રે ક્રાંતિ આવશે. પીવાના પાણી, સિંચાઈ, કૃષિ, ગ્રામ વિકાસ અને ઔદ્યોગિક વિકાસ જેવા ક્ષેત્રો પર ભાર મૂકીને ઉત્તર ગુજરાતમાં ઘર આંગણે રોજગારનું સર્જન થાય તે માટે સરકારે આયોજન કર્યું છે. જેના કારણે ઉત્તર ગુજરાતમાં ઉદ્યોગો ધમધમી રહ્યા છે. માં નર્મદાનું પાણી ઘર-ઘર અને ખેતરે-ખેતરે પહોંચવાથી કૃષિ વિકાસને નવું જોમ મળ્યું છે.
ઉત્તર ગુજરાતમાં 20 –22 વર્ષથી સિંચાઈનો વ્યાપ ખૂબ જ વધી ગયો છે, એવું કહી તેમણે ઉમેર્યું હતું કે, મનેએ વાતનો આનંદ છે કે, આપણે ટપક સિંચાઈ, સૂક્ષ્મ સિંચાઈ અને નવી ટેકનીકથી ગુજરાતના ખેડૂતો ખેતી કરી રહયા છે. અને ગુજરાતનો એક એક જિલ્લો ટપક સિંચાઈ અને સૂક્ષ્મ સિંચાઈને વરી ગયો છે. આજે બનાસકાંઠા જિલ્લો સૂક્ષ્મ સિંચાઈ પદ્ધતિનો એક ઉમદા દ્રષ્ટાંત બની ગયો છે. ઉત્તર ગુજરાતનો કિસાન મુશ્કેલીમાં જીવતો હતો અને મુશ્કેલીમાં પોતાના પાકની લરણી કરતો હતો. તે કિસાન આજે તે પરિસ્થિતિમાંથી બહાર આવીને રોકડિયા પાકની ખેતી કરવા લાગ્યો છે. વરિયાળી,જીરૂ અને ઇસબગુલ એ વિશ્વભરમાં ગુજરાતની ઓળખ કરાવે છે. દુનિયામાં કોરોના બાદ આપણી હળદર અને ઇસબગુલની ચર્ચા થઈ હતી. દેશનું ૯૦ ટકા ઇસબગુલનું પ્રોસેસિંગ ગુજરાતમાં થઈ રહ્યું છે. આજે ઉત્તર ગુજરાતમાં શાકભાજી, બટાકા, કેરી, આમળા, લીંબુ જેવા અનેક પાકોનું વાવેતર થઈ રહ્યું છે.
વડાપ્રધાનશ્રીએ ઉમેર્યું હતું કે, નોર્થ ગુજરાતના બટાકા આજે દુનિયામાં મસહૂર થઈ ગયા છે અને એક્સપોર્ટ ક્વોલિટીના બટાકા ગુજરાતમાં ઉત્પાદન થઈ રહ્યા છે. ડીસાના બટાટા અને ઓર્ગેનિક બટાકાની વિશ્વ કક્ષાએ માગ બની રહી છે. બટાટાને પ્રોસેસિંગ કરવાના પ્લાન્ટો પણ આજે બનાસકાંઠા સહિત ઉત્તર ગુજરાતમાં બની રહ્યા છે, જેનો લાભ આજે બટાકા પકાવતા ખેડૂતોને થઈ રહ્યો છે. મહેસાણામાં એગ્રો ફૂડ પ્લાન્ટ બનાવ્યા બાદ બનાસકાંઠામાં પણ મેગા ફૂડ પાર્કનું નિર્માણ થઇ રહ્યું છે.
તેમણે ઉમેર્યું હતું કે, ઉત્તર ગુજરાતમાં આજથી થોડાક વર્ષો પહેલા બહેનો અને માતાઓ લાંબુ અંતર કાપ્યા બાદ પાણી મેળવી રહી હતી. જ્યારે આજે નલ સે જલ યોજના થકી ઘરે ઘરે નળમાં પાણી આવી રહ્યું છે. જેના થકી મને અનેક માતાઓ બહેનોના આશીર્વાદ મળ્યા છે અને જેમના આશીર્વાદ થકી જ હું આગળ વધી રહ્યો છું પાણી જેવી પાયાની જરૂરિયાત માટે જળક્રાંતિ અભિયાન આપણે આગળ વધારી છે બહેનોના નેતૃત્વમાં આ સુવિધા વિકસાવી છે. જેમ ગુજરાતના ઘરોમાં પાણી પહોંચાડ્યા છે તેમ હિન્દુસ્તાના ઘરોમાં પણ પાણી પહોંચાડવાનું છે.
ડેરી સેક્ટરોમાં બહેનોની ખૂબ મોટી ભાગીદારી છે, તેવું કહી તેમણે ઉમેર્યું હતું કે, જેમના પરિશ્રમ થકી આજે ઘરની આવક તો વધી છે, પણ ગુજરાતમાં ડેરી ઉદ્યોગનો વિકાસ થયો છે. આ પશુપાલન ઉદ્યોગને આગળ વધારવા માટે અનેક પશુઓ દવાખાના બનાવવામાં આવ્યા છે. જેના પાછળનો મુખ્ય આશય પશુઓનું તબિયત સારી રહે અને પશુપાલન ઉદ્યોગની વિકાસ કરવાનો છે. છેલ્લા બે દાયકામાં ગુજરાતમાં 800 થી વધારે નવી ગ્રામ ડેરીઓની સહકારી ક્ષેત્રે શરૂ કરવામાં આવી છે. આજે બનાસ ડેરી, દૂધસાગર ડેરી અને સાબર ડેરીને વિદેશમાંથી લોકો જોવા આવી રહ્યા છે.
ખેડૂતો માટે પશુ ખૂબ મોટું ધન છે, તેવું કહી તેમણે ઉમેર્યું હતું કે, કોવિડમાં જેમ લોકોના આરોગ્ય માટે વિનામૂલ્ય રસીકરણ કરવામાં આવ્યું હતું. તેમ પશુઓના આરોગ્ય માટે મફત વેકસીન આપવાનો આરંભ દેશમાં કરવામાં આવ્યો છે. તેમણે દરેક પશુપાલકને પોતાના પશુઓને વેક્સિન અપાવી દેવા માટે પણ ભારપૂર્વક અનુરોધ કર્યો હતો અને 15,000 કરોડ રૂપિયાના ખર્ચે આ પશુ રસીકરણનું કામ ચાલી રહ્યું છે. દૂધની સાથે સાથે ખેડૂતોની બીજી ઉપજ મળે તે દિશામાં આપણે આગળ વધી રહ્યા છીએ ગોબરધનનું મોટું કામ આજે સરકાર ચલાયું રહી છે બનાસ ડેરી જેવી સંસ્થાઓ દ્વારા સીએનજી, બાયો સીએનજી અને બાયો ફ્યુલ જેવા અભિયાન પણ ચલાવવામાં આવી રહ્યું છે. ખેતરોનું વેસ્ટેડ અને પશુઓનું વેસ્ટેડનો ઉપયોગ કરી ગોબર માંથી વીજળી બનાવવાની દિશામાં પણ આપણે આગળ વધી રહ્યા છીએ.
આજે ગુજરાત વિકાસની નવી ઊંચાઈઓને પાર કરી રહ્યું છે તેવું કહી તેમણે ઉમેર્યું હતું કે, થોડાક વર્ષો પહેલા ઉત્તર ગુજરાતમાં કોઈ ઉદ્યોગ આવી જ ના શકે તેવી માન્યતા હતી. પરંતુ આજે ઉત્તર ગુજરાતના તમામ વિસ્તારોમાં કેવો ઔદ્યોગિક વિકાસ થયો છે તેની વાત કરી હતી. આજે ઉત્તર ગુજરાતમાં ઓટોમોબાઇલ ઇન્ડસ્ટ્રીઝનું હબ બનવાની દિશામાં આગળ વધી રહ્યું છે અને એક દાયકાના ટૂંકા સમયમાં ઉત્તર ગુજરાત એન્જિનિયરિંગ દવા જેવા ઔદ્યોગિક વિકાસે હરણફાળ ભરી છે. જ્યારે બનાસકાંઠા, સાબરકાંઠામાં સિરામિક ઉદ્યોગનો પણ વિકાસ ખૂબ મોટા પ્રમાણમાં થયો છે.
આવનારા સમયમાં ગ્રીન હાઈડ્રોજનના રૂપમાં સમગ્ર દેશમાં વિકાસ આગળ વધવાનો છે, તેવું કહી તેમણે ઉમેર્યુ હતું કે જેમાં પણ ઉત્તર ગુજરાતની ભૂમિકા ખૂબ મોટી રહેવાની છે આજે ઉત્તર ગુજરાતની ઓળખ સોલાર એનર્જીમાં પણ વિશ્વ કક્ષાએ બની છે. મહેસાણા જિલ્લાનું મોઢેરા ગામ સોલર ઉર્જા ના વિલેજ તરીકેની ઓળખ પ્રસ્થાપિત કરી ચૂક્યું છે. આજે ઉત્તર ગુજરાતના ગામડાના લોકો પોતાના ઘરની વીજળી મફત મેળવી વધારાની વીજળી સરકારમાં વહેંચી આવક મેળવી રહ્યા છે.
આજે ગુજરાતમાં રેલવે જોડાણના ઘણા મોટા કામો થયા છે તેવું કહી વડાપ્રધાનશ્રીએ કહ્યું હતું કે, પાંચ હજાર કરોડ રૂપિયાના વિકાસ કામોનો લાભ ગુજરાતને મળ્યો છે. આજે ડેડિકેટેડ ફ્રેઇટ કોરિડોરનાં કામનું લોકાર્પણ કરવામાં આવ્યું છે. જે ખૂબ જ ક્રાંતિકારી કામ છે, જેના થકી આજે ઉત્તર ગુજરાત પીપાવા, જામનગર અને પોરબંદર સુધી સીધી કનેક્ટિવિટીમાં આવ્યો છે. જેનો લાભ આગામી સમયમાં ઉદ્યોગ, ખેડૂતો અને પશુપાલકોનો થશે. ઉત્તર ગુજરાત લોજિસ્ટિક અને સ્ટોરેજ હબ બનાવવા ની દિશામાં પણ ખૂબ મોટું કામ કરવામાં આવી રહ્યું છે.
તેમણે ઉમેર્યું હતું કે, પૂર્વ- પશ્ચિમના 2500 કિલોમીટરનું કામ પૂર્ણ થયું છે જેના કારણે આજે ઔદ્યોગિક માલ વાહન કરતા વાહનો ખૂબ જ ઝડપથી એક સ્થળેથી બીજા સ્થળે પહોંચી રહ્યા છે. તેમજ ઉત્તર ગુજરાતનું દૂધ પણ આ કોરિડોર થકી ખૂબ જ ઝડપથી એક સ્થળેથી બીજા સ્થળે જતા તેનો બગાડ અટકી ગયો છે અને ખેડૂતોની આવકમાં વધારો થયો છે.
ગુજરાતમાં ટુરીઝમ માટેની પૂરી સંભાવનાઓ છે તેવું કહી તેમણે ઉમેર્યું હતું કે જેટલું મહત્વ કાશીનું છે તેટલું જ મહત્વ ગુજરાતના વડનગરનું છે કાશી પછી બીજું વડનગર છે કે જેનો ક્યારેય વિનાશ થયો નથી. તારંગા આબુરોડની રેલ લાઈનએ ઉત્તર ગુજરાતમાંથી પસાર થવાની છે જેના થકી તારંગા, અંબાજી અને ધરોઈ જેવા ટુરીઝમ ક્ષેત્રનો વિકાસ થશે અને પર્યટક ક્ષેત્ર સાથે સાથે ઔદ્યોગિક ક્ષેત્રનો પણ વિકાસ થશે અને દિલ્હી મુંબઈ જેવા વિસ્તારમાંથી લોકોને જગતજનની માં અંબાના દર્શન કરવા માટે અંબાજી આવવા માટેનું સરળ બની જશે. એક સમય હતો કે કચ્છનું કોઈ નામ દેતું ન હતું. પરંતુ આજે કચ્છનો રણઉત્સવ વિશ્વભરમાં પ્રખ્યાત બની ગયો છે અને ઘોરડો રણ જોવા માટે લોકો વિદેશથી આવી રહ્યા છે.
તેમણે કહું હતું કે, ગુજરાત અને દેશના ઉજવળ ભવિષ્ય માટે તથા ગુજરાતના કલ્યાણ માટે જ્યારે આપણે કામ કરી રહ્યા છે, ત્યારે હું ગુજરાતની માટીને નમન કરી નવી શક્તિ મેળવી રહ્યો છું અને પહેલા જે વિકાસના કામો થતા હતા તેની ગતિ તેજ બનાવવામાં આવશે. ગુજરાત અને દેશનું જે સપનું છે કે 2047 માં આઝાદીને 100 વર્ષ થાય ત્યારે દુનિયાના વિકસિત દેશોની હરોળમાં ભારતની ગણતરી થાય તેવી મારી અને તમારા સૌની ઈચ્છા છે, તેને પરિપૂર્ણ કરીશું. તેમણે જણાવ્યુ હતુ કે જનતા જનાર્દનના આશીર્વાદ જ મારી ઊર્જા છે.
મુખ્મંત્રીશ્રી ભુપેન્દ્રભાઈ પટેલ
મહેસાણાના ખેરાલુના ડભોડા ખાતે પ્રધાન મંત્રી શ્રી નરેન્દ્રભાઇ મોદીની ઉપસ્થિતિમાં વિકાસના વિવિધ પ્રક્લપોનું ખાતમુહૂર્ત અને લોકાર્પણ વેળાએ સંબોધતા મુખ્યમંત્રી શ્રી ભુપેન્દ્રભાઈ પટેલે જણાવ્યું હતુંકે, ઉત્તર ગુજરાતના પનોતા પુત્ર અને દેશના પ્રધાનમંત્રી શ્રી નરેન્દ્રભાઈએ દિવાળી પહેલા દિવાળીની મોટી ભેટ આ વિસ્તારને આપી છે ધરે ઘરે નવી ચેતના જગાવી વિકાસની મશાલનો પ્રકાશ નાનામાં નાના વંચિત લોકો સુધી પોહચડવા ની પ્રતિબદ્ધતા વ્યક્ત કરી છે રેલવે, રસ્તા પાણી અને માળખાગત સુવિધાઓ થકી પંચ વિકાસનો ઉત્સવ આજે યોજાઇ રહ્યો છે.અંબાજી યાત્રાધામ ખાતે દર્શનાર્થી સરળતાથી આવી શકે તે માટે તારંગા રેલવે લાઇન નો વિકાસ તો, ધરોઈ ડેમનો પર્યટન સ્થળ તરીકે વિકાસ કરવામાં આવી રહ્યો છે વધુમાં તેમને ઉમેર્યું હતું કે બહુચરાજી યાત્રાધામને નવિન ડેવલપમેન્ટ ઓથોરિટીમાં સમાવીને વિકાસની ગતિને વધુ તેજ બનાવી ઉત્તર ગુજરાતને ઉત્તમ ગુજરાત બનાવવાની કટીબદ્ધતા રાજ્યની આ સરકાર ધરાવે છે.
વધુમાં તેમણે ઉમેર્યું હતું કે, ગામડે ગામડે આજે જલ જીવન મિશનથી ઘર આંગણે પીવાના પાણી મળી રહ્યા છે. આજે તમામ ક્ષેત્રે વિકાસ થતાં ગુજરાત ગ્લોબલ મેપ પર ચમક્યું છે. જેમાં કચ્છના સફેદ રણના પ્રવાસન વૈભવને નિહાળવા દુનિયાભરના લોકો આવી રહ્યા છે. આજે પ્રગતિ પથ- કિસાન પથથી ગ્લોબલ વિલેજનો વિકાસ કરવામાં આવી રહ્યો છે. રેલવેના ગેઝ કંઝર્વેશનથી આર્થિક વિકાસને નવો વેગ મળી રહ્યો છે. દેશના અમૃત કાલમાં સર્વ પોષક – સર્વ સમાવેશક નીતિથી અખંડ ભારતનો વિકાસ વિકસ્યો છે. સરદાર પટેલે દેશની એકતા અને અખંડિતતાનો પાયો નાખ્યો હતો તો, દેશના પ્રધાનમંત્રી શ્રી નરેન્દ્રભાઈ મોદીએ સુરાજ્ય અને સુશાસનની દિશા આપવાનું કામ કર્યું છે
વડાપ્રધાન શ્રી નરેન્દ્ર મોદીના હસ્તે ₹ 5950 કરોડના વિવિધ પ્રકલ્પોનું લોકાર્પણ અને ખાતમુહૂર્ત કરવામાં આવ્યું હતું. જેમાં મહેસાણા, અમદાવાદ, બનાસકાંઠા, સાબરકાંઠા, મહીસાગર, ગાંધીનગર અને પાટણ જિલ્લાને આવરી લેવામાં આવ્યા છે. આ તમામ જિલ્લાઓ વચ્ચે કુલ 16 પ્રકલ્પો છે જેમાંથી આઠનું લોકાર્પણ અને આઠ વિકાસકાર્યોનું ખાતમુહૂર્ત કરવામાં આવ્યું હતું.
આ વિકાસ કામોમાં રેલવે અને GRIDEના પ્રકલ્પોનું કુલ મૂલ્ય ₹ 5130 કરોડ છે.જળ સંસાધનના રૂપિયા 270 કરોડના કામોનું લોકાપર્ણ અને ખાતમુહુર્ત કરવામાં આવ્યું છે. પાણી પુરવઠા વિભાગના રૂપિયા 210 કરોડના ચાર કામોનું લોકાપર્ણ અને ખાતર્મુહૂર્ત કરવામાં આવ્યું છે. માર્ગ અને મકાન વિભાગના રૂપિયા 170 કરોડના વિકાસ કામનો સમાવેશ થાય છે.શહેરી વિકાસ વિભાગના રૂપિયા 170 કરોડના કામોનો સમાવેશ થાય છે.
કેન્દ્રીય મંત્રીશ્રી દર્શનાબેન જરદોષ, કેબિનેટ મંત્રીશ્રી બલવંતસિંહ રાજપૂત, નવસારી સાંસદ અને પ્રદેશ પ્રમુખ સી.આર.પાટીલ, આરોગ્ય મંત્રી શ્રી ઋષિકેશભાઈ પટેલ, પૂર્વ નાયબ મુખ્યમંત્રીશ્રી નીતિનભાઈ પટેલ, પાટણ સાંસદશ્રી ભરતસિંહ ડાભી, મહેસાણા સાંસદશ્રી શારદાબેન પટેલ, મહેસાણા ધારાસભ્યશ્રી મુકેશભાઈ પટેલ, ધારાસભ્ય સર્વશ્રીઓ શ્રી જગદીશ ભાઈ વિશ્વકર્મા, શ્રી કુંવરજી બાવળિયા, શ્રી કિરીટ પટેલ, શ્રી સુખાજી ઠાકોર, શ્રી લવિંગજી ઠાકોર, શ્રી સરદાર ચૌધરી સહિત અગ્રણીઓ સર્વશ્રી રજની પટેલ, કે.સી પટેલ, મયંક નાયક, જિલ્લા કલેક્ટર શ્રી એમ. નાગરાજન, જિલ્લા વિકાસ અધિકારી ડો. ઓમ પ્રકાશ સહિત રાજકીય સહકારી સામાજિક અગ્રણીઓ, સંગઠનના પદાધિકારીશ્રીઓ, હોદેદારો અને ઉત્તર ગુજરાતના ગામે ગામથી વિશાળ સંખ્યામાં લોકો ઉપસ્થિત રહયા હતા.
–
ભાજપ સરકાર દ્વારા રૂ. ૩,૯૦૦ કરોડના ભ્રષ્ટાચારના દસ્તાવેજી પુરાવાઓ સાથે પત્રકાર પરિષદમાં પર્દાફાશ કરતાં ગુજરાત પ્રદેશ કોંગ્રેસ સમિતિના પ્રમુખ અને સાંસદશ્રી શક્તિસિંહ ગોહિલે જણાવ્યું હતું કે, ભારતીય જનતા પાર્ટીની સરકારમાં ભયમુક્ત ભ્રષ્ટાચાર ચાલી રહ્યો છે. માનીતા ઉદ્યોગપતિઓને માલામાલ કરવા માટે ગુજરાતની જનતાની તિજોરીની ખુલ્લી લૂંટ ભાજપના શાસનમાં ચાલી રહી છે. ગુજરાત ઉર્જા વિકાસ નિગમ લિમિટેડ (GUVNL) દ્વારા વીજળી ખરીદી માટે પાવર પર્ચેઝ એગ્રીમેન્ટ (PPA) અદાણી પાવર મુન્દ્રા લિમિટેડ સાથે કરવામાં આવ્યો હતો. આ પાવર પર્ચેઝ એગ્રીમેન્ટ મુજબ જે એનર્જી ચાર્જીસ એટલે કોલસાની ખરીદીની કિંમત પર અદાણી પાવર મુન્દ્રા લિમિટેડને પૈસા આપવા માટેની સ્કીમ બની હતી તે મુજબ અદાણી પાવર દ્વારા ખરીદાયેલા કોલસાના બીલો સ્પર્ધાત્મક રીતે ખરીદ્યા છે તેના ડોક્યુમેન્ટ્સ અને પારદર્શિતા દર્શાવતા તમામ પેપર રજુ કરવામાં આવે અને ત્યારબાદ ગુજરાત ઊર્જા વિકાસ નિગમ લિમિટેડ તેની ચકાસણી કરે અને તેની સરખામણી ARGUS (કોલસાનો આંતરરાષ્ટ્રીય બજારમાં ભાવ નક્કી કરતી સંસ્થા)નો જે ભાવ હોય તેની સરખામણી બાદ જો અદાણીએ ખરીદેલ કોલસો ઓછી કિંમતનો હોય તો તેને ધ્યાને લેવાનું અને જો ARGUSના ભાવ ઓછા હોય તો તેને ધ્યાને લઈને જ અદાણીને પૈસા મળે એવી સ્પષ્ટ જોગવાઈ હોવા છતાં વર્ષ ૨૦૧૮ થી લઈ વર્ષ ૨૦૨૩ સુધીના પાંચ વર્ષના ગાળા દરમિયાન અદાણીને રૂ. ૧૩,૮૦૨ કરોડ રૂપિયા ચૂકવી દેવામાં આવ્યા, જ્યારે ખરેખર અદાણીને મળવાપાત્ર રૂ. ૯,૯૦૨ કરોડ જ થતા હતા, એટલે રૂ. ૩,૯૦૦ કરોડ વધારે અદાણીને ચૂકવી દેવામાં આવ્યા. જ્યારે હિન્ડનબર્ગનો રિપોર્ટ આવ્યો, સુપ્રીમ કોર્ટ તપાસની કમિટી બનાવતી હતી અને સેબીની ઈન્કવાયરી શરૂ થવામાં હતી તેમજ જોઈન્ટ પાર્લામેન્ટરી કમિટી (JPC) પણ વિરોધ પક્ષે માંગી ત્યારે અધિકારીઓએ આ મોટા ભ્રષ્ટાચારમાં પોતાને તકલીફ ન ઊભી થાય તે માટે ગુજરાત ઊર્જા વિકાસ નિગમ લિમિટેડે અદાણી પાવર મુન્દ્ર લિમિટેડને પત્ર લખીને કહ્યું કે, વારંવાર માંગણી કરવા છતાં અદાણી પાવર દ્વારા ખરીદાયેલ કોલસાના બિલો આપવામાં આવતા નથી, સ્પર્ધાત્મક ભાવ અંગેના કે પારદર્શિતા અંગેના ડોક્યુમેન્ટ્સ આપવામાં આવતા નથી અને માત્ર ચોક્કસ લોકો પાસેથી ઊંચા ભાવે કોલસો ખરીદ્યાની વાત કરીને રૂ. 13,802 કરોડ સરકાર પાસેથી લીધા છે. કરાર મુજબ ARGUSના ભાવ ધ્યાને લેતા અદાણીને ખરેખર વર્ષ ૨૦૧૮થી વર્ષ ૨૦૨૩ સુધીમાં મળવાપાત્ર રૂ. ૯,૯૦૨ કરોડ જ થાય છે, એટલે કે રૂ. ૩,૯૦૦ કરોડ ગુજરાત ઊર્જા વિકાસ નિગમ લિમિટેડે અદાણીને વધારે ચૂકવી દીધા છે અને તે પરત આપી દેવા પત્ર લખી નાંખ્યો. હકીકતમાં આ એક મોટું કૌભાંડ ચાલતું હતું અને જ્યારે તપાસ થશે તેવી બીક લાગી ત્યારે માત્ર પત્ર લખી નાખવામાં આવ્યો છે. આ રીતે ચૂકવાયેલ નાણાંનો બોજ આખરે ગુજરાતમાં વીજળીનો ઉપયોગ કરનારા ગુજરાતીઓના માથે ઝીંકાયો છે. માનીતા ઉદ્યોગપતિઓને માલામાલ કરવા માટે ગુજરાતીઓને મોંઘી વીજળી ખરીદવી પડે તેવો ઘાટ ભાજપ સરકારે ઉભો કર્યો છે. વગર બિલો મેળવ્યે અને ARGUSના ભાવ કરતાં વધારે રકમ કોના કહેવાથી ચૂકવી આપવામાં આવી ? રૂ. ૩,૯૦૦ કરોડ વધારે ચૂકવી દીધા તેનું વ્યાજ અદાણી પાસેથી વસુલ કરવાનું શા માટે નથી લખાયું ? આ એક પ્રકારનું મની લોન્ડરીંગ છે ત્યારે ઈ.ડી., સી.બી.આઈ. અને સેબી કેસ દાખલ કરીને કેમ તપાસ કરતી નથી ? પાંચ વર્ષ સુધી કોઈપણ જાતના બિલો વગર કોના કહેવાથી અદાણીને કરોડો રૂપિયા ચૂકવી દેવામાં આવ્યા ? અત્યાર સુધીમાં અદાણી પાસેથી કેટલા રૂપિયા વસૂલ કરવામાં આવ્યા ? ૩૯૦૦ કરોડના ભયમુક્ત ભ્રષ્ટાચારમાં કોણ કોણ સામેલ છે? અને કોના કહેવાથી આટલી મોટી રકમ મળતીયા કંપનીને આપી દેવામાં આવી આ તમામ સવાલો અંગે તે અંગે તટસ્થ તપાસ કરવામાં આવે તેવી કોંગ્રેસ પક્ષ માંગ કરે છે.
26 ઓગસ્ટ, 2023, શનિવારે નવી દિલ્હી અને અમદાવાદ ખાતેથી ખાસ પ્રેસ કોન્ફરન્સમાં દસ્તાવેજી પુરાવા સાથે 3,900 કરોડ રૂપિયા કેવી રીતે માનીતા ઉદ્યોગપતિને આપી દેવામાં આવ્યા છે તેની હકીકતો રજૂ કરવામાં આવી હતી. સંપૂર્ણ ખોટી રીતે અપાયેલા 3,900 કરોડ રૂપિયા વસુલ કરવા જોઈએ તે સ્વીકારવાના બદલે ગઈકાલે ગુજરાત સરકારના એક મંત્રીશ્રીતરીકે આપશ્રી દ્વારા સંપુર્ણ કૌભાંડને છાવરવાનો પ્રયત્ન કરવામાં આવ્યો અને એકપણ સત્ય હકીકત કે કોઈને પણ ગળે ઉતરી શકે તેવી મુદ્દાવાર વાત કરવામાં આવી નહોતી ત્યારે આજે ગુજરાત સરકારના મંત્રીશ્રીતરીકે આપશ્રી એ કરેલા સંપુર્ણ આધારવિહીન ખુલાસા પછી કેટલાક વધારાના સવાલો ઉભા થાય છે અને હું પૂછવા માંગું છું કે, જે પત્ર મેં પ્રેસ કોન્ફરન્સમાં રજૂ કર્યો હતો તે ગુજરાત ઊર્જા વિકાસ નિગમ લિમિટેડનો જ હતો અને એમાં કોઈપણ જાતની છેડછાડ થઈ હોય તેવું આપ મંત્રીશ્રી પણ બોલ્યા નથી ત્યારે GUVNLના સરકારના તા. 15-5-2023ના પત્રમાં જ સ્પષ્ટ રીતે લખાયું છે કે અદાણી પાવર મુન્દ્રા લિમિટેડ દ્વારા કોઈપણ પ્રકારના બિલો, સપોર્ટીંગ ડોક્યુમેન્ટ્સ કે રીપોર્ટ્સ પાંચ વર્ષ સુધી રજૂ કરવામાં નથી અને સ્પષ્ટ રીતે એ પત્રમાં જ લખાયું છે કે, જે કિંમત કોલસાની બતાવવામાં આવી છે તે બજારકિંમત કરતાં ખૂબ જ ઊંચી બતાવવામાં આવી છે. આ જ પત્રમાં સ્પષ્ટ રીતે લખવામાં આવ્યું છે કે, મંત્રાલય દ્વારા જ સ્પષ્ટ રીતે કહેવાયું છે કે ARGUSની કિંમતને જ ધ્યાને લઈને અદાણી પાવર મુન્દ્રા લિમિટેડને પૈસા ચૂકવી શકાય. ગુજરાત સરકારના મંત્રીશ્રી તરીકે આપ આ પત્રમાં જે વ્યવસ્થિત વસ્તુ લખાયેલ છે તે કેમ સ્વીકારતા નથી ? આ પત્રમાં સ્પષ્ટ લખાયું છે કે ગુજરાત ઊર્જા વિકાસ નિગમ લિમિટેડના બોર્ડમાં નક્કી થયું છે અને તે મુજબ કિંમત ધ્યાને લેતાં રૂ. 3,900 કરોડનું વધારાનું ચૂકવણું અદાણી પાવર મુન્દ્રા લિમિટેડને કરી દેવામાં આવ્યું છે. તો સવાલ એ છે કે ગુજરાત સરકારના મંત્રીશ્રી તરીકે આપ સરકારના જ પોતાના GUVNLના બોર્ડમાં થયેલ ઠરાવને શું ખોટો ગણે છે ? જો અધિકારીઓએ પોતે જ પોતાના પત્રમાં લખ્યું છે કે અદાણી પાવર મુન્દ્રા લિમિટેડ ઉંચા ભાવે કોલસાની વાત કરે છે જે બજારકિંમતે નથી અને બિલો કે ડોક્યુમેન્ટ્સ પણ રજુ કરતા નથી, તો શું ગુજરાત સરકાર પોતાના જ વિભાગના અધિકારીઓના લખાયેલ પત્રને સ્વીકારતા નથી ? મંત્રીશ્રી તરીકે આપ દ્વારા કોઈપણ મુદ્દાનો ખુલાસો કરવામાં આવ્યો નથી.
વધુમાં જો મેં પ્રેસ કોન્ફરન્સમાં આપેલો GUVNLનો પત્ર ખોટો હોય અથવા તેમાં કોઈ ચેડા થયા હોય તો મારી સામે સરકાર કેસ કરે અને નહીં તો GUVNL કે જે સરકારનું જ બોર્ડ છે તેને સંપૂર્ણ વિચારણાના અંતે તેમજ સરકારના ઊર્જા વિભાગે આપેલ સુચના મુજબ જ્યારે ARGUSના ભાવ મુજબ ગણતરી કરીને રૂ. 3,900 કરોડ પાછા આપી દેવા માટે જણાવ્યું છે તે પૈસા કેમ પાછા લેવામાં નથી આવતા? જે રૂ. 3,900 કરોડ વધારાના ચુકવાયા છે તેનું વ્યાજ ધ્યાને લેવામાં આવે તો બેંકના સાદા વ્યાજ મુજબ પણ પાંચ વર્ષ સુધી અપાયેલી રકમ વ્યાજની ઉમેરીએ તો રૂ, 3,900 કરોડ કરતાં આંકડો અનેકગણો મોટો થાય છે તે વસુલ કરવા પણ સરકાર કેમ તૈયાર નથી ? ગુજરાત સરકારના મંત્રીશ્રી તરીકે આપ એવી પણ સ્પષ્ટતા કરતા નથી કે જ્યારે કોઈપણ બિલોના આધાર વગર ઉંચી કિંમતના પૈસા ચૂકવી દેવામાં આવ્યા ત્યારે જે વ્યક્તિ GUVNLમાં ડાયરેક્ટર (ફાયનાન્સ) હતા તે આજે અદાણીની કંપનીમાં CEO તરીકે છે તે વાત ખરી છે ? અને જો આ વાત સત્ય હોય તો આ બાબતમાં સરકાર શું પગલાં ભરવા માંગે છે ? તે પણ સરકાર જણાવે. બોગસ માંગણીઓ બિલો આપ્યા વગર કે ARGUSના ભાવ ધ્યાને લીધા વગર સરકાર ખાનગી કંપનીને પૈસાની લુંટ કરવાની છુટ આપે તો આખરે ગુજરાત રાજ્યના અનેક વીજળી ઉપયોગ કરતા ગુજરાતીઓના માથે કરોડો રૂપિયાનું ભારણ આવશે તે અંગે સરકાર કેમ ચુપ છે ? છેલ્લે એટલું જ જણાવવાનું છે કે જ્યારે સરકારના પોતાના જ પરિપત્રને સ્પષ્ટ ધ્યાને લઈએ તો સમગ્ર કેસ એ મની લોન્ડરીંગનો કેસ થાય છે અને ત્યારે આ પ્રકારના ભયમુક્ત ભ્રષ્ટાચારનો એજન્ડા લઈને ભાજપ ચાલી રહી છે અને માનીતા ઉદ્યોગપતિઓને પ્રજાના ઉપર ભારણ નાંખીને કરોડો રૂપિયાનો ફાયદો કરાવે છે તે અંગે યોગ્ય તપાસ શા માટે નહીં ?
હિંમતનગર જી.આઈ.ડી.સી. એસોસીએશન દ્વારા નવનીર્મિત કોનફરન્સ હોલનું ઉદ્દઘાટન કરાયું
પ્રશાસક શ્રી પ્રકૂલભાઇ પટેલ અને મંત્રીશ્રી બલવંતસિંહ રાજપૂતની પ્રેરક ઉપસ્થિતિ
સાબરકાંઠા જિલ્લાના હિંમતનગરના જી આઇ ડી સી એસોસીએશન દ્વારા નવનીર્મિત કોન્ફરન્સ હોલનું ઉદ્દઘાટન દિવ, દમણ અને દાદરા નગર હવેલીના પ્રશાસક શ્રી પ્રફૂલભાઇ પટેલ અને મંત્રી શ્રી બળવંતસિંહ રાજપૂતની ઉપસ્થિતિમાં યોજાયું હતું.
જિલ્લાના ઉધોગોથી ધમધમતા વિસ્તારમાં મોતીપુરામાં ઉધોગકારોને વિકાસની નવી પાંખ અને સહૂલિયત મળી રહે તે માટે જીઆઇડીસી વિસ્તારમાં કોન્ફરન્સ હોલનું નિર્માણ કરવામાં આવ્યું છે જેને ખુલ્લો મુકતા દિવ, દમણ અને દાદરા નગર હવેલીના પ્રશાસક શ્રી પ્રફૂલભાઇ પટેલે જણાવ્યું હતું કે, કે ઉધોગો એ દેશના કરોડરજ્જુ સમાન છે, દેશમાં ઉધોગો માટે સારુ વાતાવરણ હશે તો વિદેશી રોકાણની તેટલી જ નવી તકોનું નિર્માણ થઇ શકે વર્ષો અગાઉ દેશમાં નાનામાં નાની ચીજવસ્તુઓ માટે વિદેશ પર નિર્ભર રહેવું પડતું હતું પરંતુ દેશના પ્રધાનમંત્રી શ્રી નરેન્દ્રભાઇ મોદીના શાસનમાં ઉધોગોને નવી દિશા આપવાનું કામ કર્યુ છે. આ ઉપરાંત તેમણે કહ્યું હતું કે એક નીલકટર ચીનમાંથી આયાત કરવું પડતું હોય તો આપણે કેમ ના બનાવી શકીએ. આવા નાના નાના કેટલાય ઉદ્યોગોની વ્યાપકતા વધારીએ તો નાનો માણસ પણ મોટા ઉદ્યોગ તરફ પગરવ માંડી શકે.તેમણે ઉધોગકારોને સમાજપયોગી પ્રવૃતિનું આહ્વાન કરતા કહ્યુ હતું કે કુપોષિત બાળકોને દત્તક લઇ તેમજ શિક્ષણની જરૂરીયાતવાળા બાળકોને શિક્ષણ સહાય મળે તે દિશામાં કામગીરી કરવા જણાવ્યું હતું.
શ્રમ અને રોજગાર તથા ઉધોગ મંત્રી શ્રી બલવંતસિંહ રાજપૂત એ જણાવતા કહ્યું કે ગુજરાત ઉદ્યોગ વિકાસમાં સૌથી આગળ છે. પ્રધાનમંત્રી શ્રી નરેન્દ્રભાઇ મોદીના શાસનના નવ વર્ષ પૂર્ણ કર્યા છે ત્યારે આ સમયગાળામાં નાના મોટા ઉદ્યોગોને લોન આપી વેગવંતો કર્યા છે. ગુજરાતીઓને સાહસિક તરીકે ગણાવતા કહ્યુ હતું કે, ગુજરાતીઓ નાની મૂડીથી પણ સારો ધંધો ચાલુ કરી શકે તેટલી આવડત છે, આ ઉપરાંત ઉધોગકારો ઉધોગ માટે અવકાશ મળે તે માટે રાજ્યની દરેક જી આઇ ડી સીઓને ટેકસમાં રાહત આપવાની પણ જાહેરાત પણ કરી હતી.
હિંમતનગરના ધારાસભ્ય શ્રી વી ડી ઝાલા કહ્યું કે, રાજસ્થાનનું પ્રવેશ દ્વાર ગણાતો સાબરકાંઠા જિલ્લો ઔધોગિકક્ષેત્રે પછાત હતો પરંતુ નરેન્દ્રમોદીના શાસનકાળમાં ઉધોગોને અધતન સુવિધાઓ અપાતા જિલ્લામાં નાના મોટા ઉદ્યોગો વિકાસ પામ્યા છે. જેના થકી સાબરકાંઠા જિલ્લો પણ વિકાસની ગતિમાં હરણફાળ ભરી રહ્યો છે.
કોન્ફરન્સ હોલના ઉદ્દધાટન પ્રસંગે જિલ્લા કલેકટર શ્રી નૈમેષ દવે સહિત ફેડરેશન ઓફ ઇન્ડસ્ટ્રીઝ એસોસીએશન ગુજરાતના પ્રમુખ શ્રી કાન્તિભાઇ પટેલ, હિંમતનગરના શ્યામ સુંદર સલુજા, પરશોત્તમભાઇ પટેલ સહિત નાના-મોટા ઉધોગકારો અને વેપારીમિત્રો ઉપસ્થિત રહ્યા હતા.
મંત્રીશ્રી દ્વારા પ્રગતિ હેઠળના ૭૪૮ કામોની સમીક્ષા કરાઈ
*******
સાબરકાંઠા જિલ્લામાં લઘુ,સૂક્ષ્મ અને મધ્યમ ઉદ્યોગ, કુટિર, ખાદીઅને ગ્રામ ઉદ્યોગ, નાગરિક ઉડ્ડયન, શ્રમ અને રોજગાર મંત્રીશ્રી બળવંતસિંહ રાજપૂતની અધ્યક્ષતામાં જિલ્લા આયોજન અમલીકરણ અંગેની સમીક્ષા બેઠક સર્કિટ હાઉસ ખાતે યોજાઈ હતી
આ બેઠકમાં જિલ્લામાં થયેલ કામગીરી અંગે સમીક્ષા કરવામાં આવી હતી. જેમાં સ્મશાન ગૃહની સઘડીઓ, પાણીની પરબની કામગીરી, પ્રધાનમંત્રી આવાસ યોજના, ગટરકામ, બ્લોક પેવર,શાળાના ઓરડા જેવા કામોના લક્ષ્યાંક સામે વર્તમાન પરિસ્થિતિની માહિતી મેળવી હતી જેમાં વર્ષ ૨૦૨૨-૨૩દરમિયાન વિવેકાધીન હેઠળના ૨૭૮, જિલ્લા વહીવટી તંત્રના ૧૯, જિલ્લાકક્ષાએ વિવેકાધીન હેઠળના ૧૫, નગરપાલિકાના ૧૨, પ્રોત્સાહક હેઠળના ત્રણ, ધારાસભ્ય ફંડના ૫૮, જયારે એ. ટી. વી. ટીના ૩૬૩મળી કુલ ૭૪૮ પ્રગતિ હેઠળના કામો કયાં તબક્કે કામગીરી ચાલી રહી છે તે અંગેની સમીક્ષા કરી હતી. આ ઉપરાંત વર્ષ ૨૦૨૦-૨૧ ના ૬૪ અને ૨૦૨૧-૨૨ના ૪૫૮ પ્રગતિ હેઠળના કામોની પણ સમીક્ષા કરાઈ હતી.
વધુમાં તેમને જણાવ્યું હતું કે જિલ્લામાં અમુક ગામોમાં ગામતળ ન હોવાથી લોકોને પ્રધાનમંત્રી આવાસ યોજનાનો લાભ મળતો નથી. આથી દરેક તાલુકાકક્ષાના અધિકારીશ્રીઓએ કયા કયા ગામોમાં ગામતળ નથી તેની વિગતો ટૂંક સમયમાં મેળવી લેવી. આથી તે અંગે કામગીરી હાથ ધરી શકાય તેમજ જિલ્લામાં બાકી રહેતી કામગીરી ઝડપથી પૂર્ણ કરવા અનુરોધ કર્યો હતો. તેમજ ટૂંક સમય પહેલા જ ધોરણ ૧૦ અને ૧૨નું પરિણામ જાહેર થયું છે. જિલ્લામાં શિક્ષણનું પ્રમાણ કઈ રીતે વધારી શકાય તે માટે જરૂરી આયોજન હાથ ધરવા અંગે જણાવ્યું હતું.
આ બેઠકમાં સાંસદશ્રી દિપસિંહ રાઠોડ,રાજ્યસભા સાંસદશ્રી રમીલાબેન બારા, હિંમતનગર ધારાસભ્યશ્રી વી. ડી. ઝાલા, પ્રાંતિજ ધારાસભ્યશ્રી ગજેન્દ્રસિંહ પરમાર, જિલ્લા પંચાયત પ્રમુખશ્રી ધીરજભાઈ પટેલ, જિલ્લા કલેક્ટરશ્રી નૈમેષ દવે, જિલ્લા આયોજન અધિકારીશ્રી તેમજ વિવિધ વિભાગના અમલીકરણ અધિકારીશ્રીઓ ઉપસ્થિત રહ્યા હતા.
પોસ્ટ વિભાગ દ્વારા “વિશ્વ પર્યાવરણ દિવસ” ના દિવસે પર્યાવરણ જાગૃતિના વિવિધ કાર્યક્રમો યોજાશે
**************************
સાબરકાંઠા અને અરવલ્લી વિભાગ હિમતનગર દ્વારા અધિક્ષક ડાકઘર, સાબરકાંઠા વિભાગ તથા અરવલ્લી જીલ્લાની કુલ ૫૩ સબ પોસ્ટ ઓફીસમાં તારીખ ૦૫ જૂન ૨૦૨૩ ના રોજ “વિશ્વ પર્યાવરણ દિવસ” ના ભાગરૂપે ” “મિશન લાઈફ સ્ટાઇલ પર્યાવરણ અંતર્ગત હાલના પર્યાવરણ પર આપણી રહેણીકરણીની અસર, પર્યાવરણ વિષય પર નિબંધ લેખન, પ્રશ્ન સ્પર્ધા , સોલાર પાવર પેકની સફાઈ, વરસાદના પાણીની જાળવણી, વૃક્ષારોપણ, સફાઈ અભિયાન, ખોરાકનો બગાડ અટકાવવો અને રંગોલી સ્પર્ધા સહિતના પર્યાવરણ જાગૃતિના સંદેશો આપતી પ્રવૃત્તિ સાબરકાંઠા તેમજ અરવલ્લી જીલ્લાની ૫૩ પોસ્ટ ઓફિસોમાં હાથ ધરવામાં આવશે. જેમાં સાબરકાંઠા અને અરવલ્લીના તમામ પોસ્ટલ સ્ટાફ અને દરેક નાગરિકને ઓનલાઈન https://e-hrms/.gov.in પોર્ટલ પર પર્યાવરણને બચાવવા માટેની પ્રતિજ્ઞા લેવા માટે અપીલ કરાઇ છે.
ગુજરાતમાં છેલ્લા 27 વર્ષથી સત્તાસ્થાને રહેલી ભાજપ 156 સીટો લઈને ફરીથી સત્તામાં આવી છે. આ વખતે મુખ્યમંત્રી તરીકે ભુપેન્દ્રભાઈ પટેલે ફરીથી શપથવિધિ લીધી છે. સાથે સાથે નવા મંત્રીમંડળનું લોકો એ ઉત્સુકતાથી જે રાહ જોઈ હતી તે હવે પૂરી થઈ.
16 મંત્રીઓ જેમાં આઠ કેબિનેટ અને આઠ રાજ્યમંત્રીઓનો સામેલ છે. તેઓએ આજે પદ અને ગોપનીયતાના શપથવિધિ લીધા હતા. શપથ વિધિ કાર્યક્રમના હેલીપેડ ગ્રાઉન્ડ પર યોજાયો હતો જેમાં મોટી સંખ્યામાં ભાજપના કાર્યકર્તાઓ તેમજ કેન્દ્રીય મંત્રીઓ અનેેે વડાપ્રધાન નરેન્દ્ર મોદી કાર્યક્રમમાં હાજર રહ્યા હતા. ભારત સરકારનું કેન્દ્રીય મંત્રીમંડળના વરિષ્ઠ પ્રધાનો – સ્મૃતિ ઈરાની, રાજનાથ સિંહ તેમજ અન્ય કેબિનેટ પ્રધાનો ભાજપ શાસિત રાજ્યોના- હરિયાણા, મહારાષ્ટ્ર ,મધ્યપ્રદેશ, ઉત્તરપ્રદેશ,આસામના મુખ્યમંત્રીઓ પણ આ શપથવિધિમાં હાજર રહ્યા હતા
શું છે નવા મંત્રીમંડળની લાક્ષણિકતા?-2024 ની લોકસભા ચૂંટણી ધ્યાનમાં રાખીને બનાવવામાં આવ્યું છે મંત્રીમંડળ
અલગ અલગ જાતિઓનું સમીકરણ તેમજ એમનું સમતોલન નવા મંત્રીમંડળમાં સામેલ કરવામાં આવ્યું છે. ભાજપની યુવા બ્રિગેડ હાર્દિક પટેલ , અલ્પેશ ઠાકોર અને રિવાબા જાડેજા ને મંત્રીમંડળમાં સ્થાન આપવામાં નથી આવ્યું.
યુવા અને અનુભવી એમ બંને પ્રકારના મંત્રીઓને નવા મંત્રીમંડળમાં લેવામાં આવ્યા છે. ગઈકાલે રાત્રે જ વડાપ્રધાન મોદી ગાંધીનગર આવી ગયા હતા અને ગુજરાત રાજ્યની ભાજપ સાથે ચર્ચા વિચારણા કરીને આ નવું મંત્રીમંડળની રચના કરવામાં આવી છે. 2024 માં લોકસભા ચૂંટણીની સફળતા માટે તૈયારીના ભાગરૂપે નવો મંત્રીમંડળ બધું સમજી વિચારીને તૈયાર કરવામાં આવી છે.
8 ધારાસભ્યોએ કેબિનેટ મંત્રીના શપથ લીધા
ઋષિકેશ ગણેશભાઈ પટેલ-Patidar
રાઘવજી પટેલ-Patidar,
બળવંતસિંહ ચંદનસિંહ રાજપુત
કુવરજીભાઈ મોહનભાઈ બાવળીયા-Koli
ડો. કુબેરભાઈ ડીંડોર,
શ્રીમતી ભાનુબેન બાબરીયા,
મુળુભાઈ બહેરા
કનુભાઈ દેસાઈ
રાજ્યકક્ષાના મંત્રીઓ- બે સ્વતંત્ર હવાલો અને છ રાજ્યમંત્રી
હર્ષ રમેશકુમાર સંઘવી-Jain Samaj
જગદીશ વિશ્વકર્મા- OBC
પરસોત્તમભાઈ ઓધવજીભાઈ સોલંકી-Koli
બચુભાઈ મગનભાઈ ખાબડ
મુકેશભાઈ ઝીણાભાઈ પટેલ
પ્રફુલ પાનસેરીયા
ભીખુસિંહજી ચતુરસિંહજી પરમાર
કુવરજીભાઈ નરસિંહભાઈ હળપતિ
આમ નવા મંત્રીમંડળમાં ગુજરાત સરકારમાં 16 મંત્રીઓ જેમાં આઠ કેબિનેટ અને આઠ રાજ્યમંત્રીઓનો સામેલ છે. તેમને ખાતાની ફાળવણી હવે પછી જાહેર થશે. કુલ મળીને 25 જેટલી સંખ્યાના આસપાસ મંત્રીઓની મંત્રીમંડળ રચવામાં આવશે એવી સંભાવના રહેલી છે.
ગુરુવારે જાહેર થયેલા ગુજરાતી વિધાનસભાની ચૂંટણીના પરિણામો એ સૌ કોઈને આશ્ચર્યચકિત કરી દીધા છે.
ખાસ કરીને ભાજપને 156 સીટ મળવી, આપ પાર્ટીને પાંચ સીટ અને કોંગ્રેસની 17 સીટ તેમજ અપક્ષ ઉમેદવારો ચાર સીટ મળે એ જોઈને – આ બધી ગણતરીઓ જોઈને હજુ પણ લોકો માથું ખંજવાડી રહ્યા છે!
જે રીતે શરૂઆતથી જ ભાજપ સવારના સમય મત ગણતરીના થોડાક કલાકોમાં દરેક જિલ્લાઓમાં મત ગણતરીમાં તેના ઉમેદવારો આગળ ચાલવા લાગ્યા એનાથી ઘણી વખત તો એવું લાગતું હતું કે બે ત્રણ કલાક બાદ કોંગ્રેસના ઉમેદવારો પણ આ આગળ વધી રહેલા મત ની સરસાઇ ને સરભર કરી દેશે અને કોંગ્રેસ 50 -60 સીટ સુધી જરૂર દેખાશે!
પરંતુ આ બધી આશા બપોરના એક – બે વાગ્યા પછી ઠગારી નીકળી હતી!
જો ખરેખર કોંગ્રેસની હારનું પોસ્ટમોર્ટમ કરવા જઈએ તો એક વસ્તુ ખૂબ જ ઉડી વળગે છે અને એ છે કે નવા પક્ષ આપ પાર્ટીને સફળ થવા દેવા માટે કોંગ્રેસી નેતાઓએ ગુનાહિત બેદરકારી દાખવી … તે માટે તેમને માથા ને મુંડન કરાવી નાખવા જોઈએ. આ પાર્ટી એની ભૂલોમાંથી ખરેખર છેલ્લા ચાર વિધાનસભા ચૂંટણી ઓમા હાર થાય બાદ કંઈક બોધપાઠ લે છે કે નહીં એ પ્રશ્નો પણ હવે ગુજરાતના મતદારોમાં થઈ રહ્યા છે!
સામે પક્ષે ભાજપમાં આજે તેને ગાંધીનગર સ્થિત કાર્યાલય કમલમ ખાતે મુલાકાત લેવાથી એ ચોક્કસ દેખાઈ રહ્યું હતું કે કાર્યકર્તાઓમાં પહેલીથી જ પાર્ટીને જીતાડવાનું ઉત્સાહ સમાયો હતો ! પરંતુ આટલી મોટી જીત મળશે એવી તો કલ્પના ભાજપના કાર્યકર્તાઓને કે સ્થાનિક નેતાઓને પણ નહોતી!
ખેર, જ્યારે હું મારા હિંમતનગર થી ગાંધીનગર આવવા ગુરુવારે નીકળ્યો ત્યારે મને રસ્તામાં બસમાં મુસાફર જોડે એ જાણવા મળ્યું કે આટલી મોટી જીત ભાજપને મળે એ માનવામાં નથી આવતું. મોટાભાગના મુસાફર એમ કહેતા હતા કે આ કદાચ મશીનની પણ ગડબડ હોઈ શકે!
ટૂંકમાં જનતાને તો હજુ એવું લાગતું જ નથી ખરેખર ભાજપની જીત એ ખરેખર સાચી છે!
છતાં હવે પાંચ વર્ષ નવી ભાજપની અને ભુપેન્દ્રભાઈ ની સરકાર શું ગુજરાતની દિશા અને દશા ગુજરાતીઓની કરશે તે તો સમય જ કહી બતાવશે.
Source: Twitter
Performance of @BJP4India in Gujarat Assembly Election.
1985 – 11
1990 – 67
1995 – 121
1998 – 117
2002- 127
2007 – 117
2012 – 115
2017 – 99
2023 – 150 +
Hats off to PM @narendramodi Ji and dedicated karyakartas of @BJP4Gujarat.
સાબરકાંઠા જિલ્લામાં શાંતિપૂર્ણ માહોલમાં મતદાન ગણતરી સંપન્ન
હિંમતનગર, ઇડર અને પ્રાંતિજ બેઠક પર ભાજપ વિજેતા, ખેડબ્રહ્મા બેઠક પર કોંગ્રેસ વિજેતા
વિધાનસભા સામાન્ય ચૂંટણી-૨૦૨૨ અંતર્ગત સાબરકાંઠા જિલ્લામાં ગુરૂવારના રોજ હિંમતનગરની પોલિટેકનિક કોલેજ ખાતે સાબરકાંઠા જિલ્લાની ચારેય વિધાનસભા બેઠકની મતગણતરી યોજાઇ હતી આ મતગણના શાંતિપૂર્ણ માહોલમાં મતદાન સંપન્ન થઇ હતી. સાબરકાંઠા જેમાં સાબરકાંઠા જિલ્લાના ૧૩૨૩ મતદાન મથકો પર કુલ ૧૧,૧૦,૦૩૧મતદારો પૈકી ૭,૯૨,૮૫૪ મતદારોએ પોતાના મતાધિકારનો ઉપયોગ કરી ૭૧.૪૩ ટકા મતદાન નોધાવ્યું હતું
સાબરકાંઠા જિલ્લામાં સમાવિષ્ટ હિંમતનગર, ઇડર, ખેડબ્રહ્મા અને પ્રાંતિજ બેઠકની મતગણતરી સવારે ૮ કલાકે પોલિટેકનિક કોલેજ ખાતે યોજાયેલ મતગણતરીમાં હિંમતનગર, ઇડર અને પ્રાંતિજ બેઠક પર ભારતીય જનતા પાર્ટી વિજેતા થઇ હતી જયારે ખેડબ્રહ્મા બેઠક પર કોંગ્રેસ પક્ષનો વિજય થયો હતો. જેમાં હિંમતનગર બેઠક પર ૨૪૫૬, ઇડરમાં ૩૫૬૮ ખેડબ્રહ્મામાં ૭૩૩૧ અને પ્રાંતિજમાં ૩૧૧૪ મતદારોએ નોટા (NOTA)માં મતદાન કર્યુ હતું.
હિંમતનગર વિધાનસભા બેઠક 1995થી ભાજપનો ગઢ રહ્યો છે. હિંમતનગર વિધાનસભા બેઠક પર ભાજપના વી.ડી. ઝાલાની જીત થઈ છે, જ્યારે કોંગ્રેસના કમલેશ પટેલની હાર થઈ છે.
આજે હિંમતનગરની બેઠક પર વિધાનસભાની ચૂંટણીનો મત ગણતરી શરૂ થઈ ત્યારથી ભારે રસાકસીનો માહોલ રહ્યો હતો ખાસ કરીને શરૂઆતના તબક્કામાં કમલેશ પટેલ આઠ નવ હજારની લીડ થી આગળ ચાલી રહ્યા હતા પરંતુ પાછળથી એટલે કે બપોરે 12:30 પછી વીડી ઝાલાની લીડ આગળ વધવા લાગી એટલું જ નહીં ભાજપના વીડી ઝાલાએ કોંગ્રેસના કમલેશ પટેલને હરાવી દીધા હતા
ગુજરાતની હિંમતનગર બેઠકનું પરિણામ 2022
હિંમતનગર વિધાનસભા બેઠક પર ભાજપના વી.ડી. ઝાલાની જીત થઈ છે, જ્યારે કોંગ્રેસના ઉમેદવાર કમલેશ પટેલની હાર થઈ છે. આ વખતની ટર્મમાં ભાજપે વિનેન્દ્રસિંહ દિલીપસિંહ ઝાલા (વીડી ઝાલા) ને ટિકિટ આપી હિંમતનગરથી ચૂંટણીના મેદાનમાં ઉતાર્યા છે. તેમની પાસે રૂપિયા 6660255 ની જંગમ મિલકત છે. વીડી ઝાલાએ બી.એસ.સી. એલ.એલ.બી સુધીનો અભ્યાસ કર્યો છે. ત્યારે કોગ્રેંસે કમલેશ જ્યંતિભાઈ પટેલને ટિકિટ આપી છે. તેમની પાસે રૂપિયા 25141091 ની જંગમ મિલકત છે. કમલેશભાઈ પટેલના અભ્યાસની વાત કરીએ તો તેમણે ધોરણ 12 સુધીનું શિક્ષણ મેળવ્યું છે. ત્યારે આમ આદમી પાર્ટીએ ભાજપ અને કોંગ્રેસના ઉમેદવાર સામે નિર્મલસિંહ અજબસિંહ પરમારને ઉમેદવાર તરીકે ચૂંટણીના મેદાનમાં ઉતાર્યા છે. તેમની પાસે રૂપિયા 993410 ની જંગમ મિલકત છે. નિર્મલસિંહ પરમારે બીએ સુધી અભ્યાસ કર્યો
ગુજરાત વિધાનસભાની ચૂંટણી પહેલા ઓપિનિયન પોલની વણઝાર શરૂ થઈ ગઈ છે. દરેક ચેનલ 7 કરોડ ગુજરાતીમાંથી ગણતરીના જ શહેરોના માત્ર 20-25 હજાર લોકોને પુછીને કોને કેટલી સીટ આવશે તેની ભવિષ્યવાણી કરી દે છે(કોઈ ખાસ પક્ષ માટે માહોલ બનાવવાનું કામ કરે છે). ગઈકાલે જ ABP-CVoterનો સર્વે આવ્યો એમાં ભારતીય જનતા પાર્ટીને 134થી 142 બેઠકો પર જીતતી દેખાડવામાં આવી છે.
હવે એક નજર નીચેના આંકડાઓ પર નાંખો
2002માં ભાજપને 127 બેઠકો મળી હતી. 2007માં ભાજપને 117 બેઠકો મળી હતી. 2012માં ભાજપને 115 બેઠકો મળી હતી. 2017માં ભાજપને 99 બેઠકો મળી હતી.
આમ, 2002થી લઈને આજ સુધી ભાજપની બેઠકમાં સતત ઘટાડો જ થયો છે. ભલે પછી નરેન્દ્ર મોદી મુખ્યમંત્રી હોય, આનંદીબેન હોય કે વિજય રૂપાણી હોય. (નોંધ 2017ની ચૂંટણીમાં પણ ડબલ એન્જિન સરકાર હતી હો).
અત્યારે ચેનલવાળા ભાજપની 140 બેઠક દેખાડે છે તો છેલ્લા 5 વર્ષમાં એવું તે શું કર્યું છે આ સરકારે જે નરેન્દ્ર મોદી, આનંદીબેન કે વિજયભાઈ કરતા પણ વધારે બેઠક આવી જશે.
તો આવો તમને 5 વર્ષમાં ભાજપના કામો(કાંડો)ની ગણતરી કરાવી દઉ.. આ વાયબ્રંટ ગુજરાતમાં છેલ્લા 5 વર્ષથી શું થાય છે..
↘️કરોડો રૂપિયાના મગફળી કૌભાંડમાં ગોડાઉન સળગે છે
↘️મંત્રીનો દિકરો લેડી કોન્સ્ટેબલ સાથે દાદાગીરી કરે છે ↘️માથાભારે તત્વો મેહુલ બોઘરાનું માથુ ફોડે છે
↘️20થી વધુ ભૂલકાઓ તંત્રના પાપે તક્ષશીલામાં ભડથુ થઈ જાય છે.
↘️દિકરો 27 કાપલી સાથે ચોરી કરતા પકડાય અને બાપને શિક્ષણ ખાતુ અપાય છે.
આટલુ થયું છતા ગઈ વખત કરતા વધારે સીટ આવતી દેખાડવામાં આવે છે. કારણ કે, માનસિક દબાણ ઉભુ કરવાનો પ્રયાસ છે. ખોટા ભરમાતા નહી આ વખતે ભાજપ જાય છે કારણ કે,
પોલિસકર્મીઓ ભાજપથી નારાજ છે તમામ સરકારી કર્મચારીઓ નારાજ છે આંગણવાડી બહેનો નારાજ છે ખેડૂતોમાં ખુબ રોષ છે આશા વર્કર બહનો અને શિક્ષકો નારાજ છે VCE ઓપરેટર્સ નારાજ છે સરકારી નોકરીની તૈયારી કરતા 40 લાખ યુવાનો નારાજ છે નાના વેપારીઓ ખુબ નારાજ છે સાચા ગૌભકતો નારાજ છે આરોગ્યકર્મીઓ નારાજ છે પેટ્રોલ-ડિઝલના ભાવને કારણે ટ્રાન્સપોર્ટર્સ અને ડ્રાઇવર્સ નારાજ છે મોંઘવારીને કારણે ગરીબ અને મધ્યમ વર્ગ નારાજ છે ખુશ માત્ર અમીર લોકો છે જેને કશો ફર્ક નથી પડતો
એટલે મીડિયાના ભ્રમિત પ્રચારમાં ન આવતા. મીડિયાનું કામ જ ભાજપને જીતાડવાનું છે. એના જ એને પૈસા મળે છે. અને હા આ લખનાર પણ લાંબો સમય મીડિયામાં કામ કરી ચુક્યો છે એટલે અંદરની વાત જાણે છે.
સાબરકાંઠા જિલ્લામાં શાંતિપૂર્ણ માહોલમાં મતદાન સંપન્ન
સાબરકાંઠા જિલ્લામાં સરેરાશ ૬૫.૮૪ ટકા મતદાન
જિલ્લાની ખેડબ્રહ્મા વિધાનસભામાં સૌથી વધુ ૬૯.૫૪ ટકા મતદાન
પ્રાંતિજ વિધાનસભામાં ૭૨.૫૩ ટકા મતદાન સાથે પુરૂષ મતદારો અગ્રેસર જયારે ખેડબ્રહ્મામાં ૬૮.૬૧ ટકા મતદાન કરી સ્ત્રી મતદારો અગ્રેસર રહિ.
સાબરકાંઠા જિલ્લામાં લોકશાહિના અવસરે વિધાનસભા સામાન્ય ચૂંટણીનું સોમવારના રોજ યોજાયેલ બીજા તબક્કાનું મતદાન શાંતિપૂર્ણ માહોલમાં મતદાન સંપન્ન થયું હતું જેમાં સાબરકાંઠા જિલ્લામાં સરેરાશ ૬૫.૮૪ ટકા મતદાન થયું હતું. જેમાં કુલ મતદારો ૧૧,૧૦,૦૩૧ પૈકી ૭,૩૦,૮૧૪ મતદારોએ મતાધિકારનો ઉપયોગ કર્યો હતો. જેમાં ૫,૬૮,૦૦૭ પુરૂષ મતદારો પૈકી ૩,૮૩,૯૨૨ મતદારોએ મતદાન કર્યુ હતું જયારે ૫,૪૧,૯૯૧ સ્ત્રી મતદારોમાંથી ૩,૪૬,૮૭૯ મહિલાઓએ મતદાન કર્યુ હતું આ ઉપરાંત થર્ડ જેન્ડરના ૩૩ મતદારો પૈકી ૧૩થર્ડ જેન્ડરે મતદાન કર્યુ હતું. ચાર વિધાનસભા મતદાર વિભાગમાં સૌથી વધુ ખેડબ્રહ્મામાં ૬૯.૫૪ ટકા મતદાન નોંધાયું હતું જયારે સૌથી ઓછુ હિમતનગર વિધાનસભામાં ૬૨.૩૦ ટકા મતદાન થયુ હતું.
ટકાવારીની દષ્ટીએ જોઇએ તો પ્રાંતિજ વિધાનસભામાં ૭૨.૫૩ ટકા પુરૂષોએ સૌથ વધુ મતદાન કર્યુ હતું જયારે ખેડબ્રહમા વિધાનસભામાં ૬૮.૬૧ ટકા મતદાન કરી સ્ત્રી મતદારો અગ્રેસર રહિ હતી.
સાબરકાંઠા વિધાનસભા સામાન્ય ચૂંટણી- ૨૦૨૨ (૧૭.૦૦ કલાક)
વિધાનસભા મતવિભાગનો નંબર અને નામ
મતદારો
થયેલ મતદાન
ટકાવારી
પુરૂષ
સ્ત્રી
અન્ય
કુલ
પુરૂષ
સ્ત્રી
અન્ય
કુલ
પુરૂષ
સ્ત્રી
અન્ય
કુલ
૨૭ -હિંમતનગર
૧૪૩૪૦૧
૧૩૭૮૨૩
૧૯
૨૮૧૨૪૩
૯૨૧૨૩
૮૩૦૯૫
૬
૧૭૫૨૨૪
૬૪.૨૪
૬૦.૨૯
૩૧.૫૮
૬૨.૩૦
૨૮ -ઇડર
૧૪૬૧૭૯
૧૪૦૬૫૯
૫
૨૮૬૮૪૩
૯૨૯૧૬
૮૮૫૦૫
૧
૧૮૧૪૨૨
૬૩.૫૬
૬૨.૯૨
૨૦.૦૦
૬૩.૨૫
૨૯-ખેડબ્રહ્મા
૧૪૪૭૮૧
૧૩૮૨૮૭
૫
૨૮૩૦૭૩
૧૦૧૯૫૦
૯૪૮૮૩
૩
૧૯૬૮૩૬
૭૦.૪૨
૬૮.૬૧
૬૦.૦૦
૬૯.૫૪
૩૩- પ્રાંતિજ
૧૩૩૬૪૬
૧૨૫૨૨૨
૪
૨૫૮૮૭૨
૯૬૯૩૩
૮૦૩૯૬
૩
૧૭૭૩૩૨
૭૨.૫૩
૬૪.૨૦
૭૫.૦૦
૬૮.૫૦
કુલ
૫૬૮૦૦૭
૫૪૧૯૯૧
૩૩
૧૧૧૦૦૩૧
૩૮૩૯૨૨
૩૪૬૮૭૯
૧૩
૭૩૦૮૧૪
૬૭.૫૯
૬૪.૦૦
૩૯.૩૯
૬૫.૮૪
આ પહેલા દિવસમાં એક વાગ્યા સુધી સાબરકાંઠામાં ચૂંટણીનો માહોલ ઘણો જામ્યો હતો એટલું જ નહીં પરંતુ સાબરકાંઠાના કલેકટરે એક નવતર પ્રયોગના રૂપે સખી મતદાર મંડળ કે સખી મતદાન મથકનો પણ પ્રયોગ સફળતાપૂર્વક કર્યો હતો.
સાબરકાંઠા જિલ્લામાં શાંતિપૂર્ણ માહોલમાં મતદાનનો પ્રારંભ બપોરે ૧ વાગ્યા સુધી ૩૯.૭૨ ટકા મતદાન
સાબરકાંઠા જિલ્લા ચૂંટણી અધિકારી અને કલેક્ટરશ્રી હિતેષ કોયા દ્વારા હિંમતનગર ત્રિવેણી વિધ્યાલય ખાતે સખી મતદાન મથક નંબર ૭૪માં મતદાન કરી મતાધિકારનો ઉપયોગ કર્યો
સાબરકાંઠા જિલ્લાની ચાર વિધાનસભા મતવિસ્તારમાં સવારે ૮ કલાકથી મતદારો મતદાન મથકે વોટીંગ કરવા પહોંચ્યા : મતદાન મથકોએ લાંબી કતારો જોવા મળી ટ્રાન્સજેન્ડર મતદારોએ પણ મતદાન કર્યું.
ગુજરાત વિધાનસભા સામાન્ય ચૂંટણી ૨૦૨૨ ના બીજા તબક્કાની ૯૩ બેઠકો માટે આજે તારીખ ૫/૧૨/૨૦૨૨ના રોજ મતદાન યોજાયું છે. મતદાન સવારે૮ કલાકથી સાંજના ૫ કલાક સુધી મતદાન ચાલશે.
ઉત્તર ગુજરાતના સાબરકાંઠા જિલ્લાની ચાર વિધાનસભા સમાવિષ્ટ ૨૭- હિંમતનગર, ૨૮- ઇડર (અ.જા),૨૯ ખેડબ્રહ્મા(અ.જ.જા) ૩૩-પ્રાંતિજ મળી કુલ ૧૩૨૩ મતદાન મથકો નિયત કરવામાં આવેલા છે. જેમાં ૯૬૦ મતદાન મથક સ્થળની સંખ્યા આવેલી છે. અત્રેના જિલ્લામાં તારીખ ૧૦/૧૦/૨૦૨૨ની સ્થિતિએ ૫,૬૭,૩૫૩ પુરુષ મતદારો, ૫,૪૧,૩૩૭ સ્ત્રી મતદારો અને ૩૨ અન્ય મતદારો મળી કુલ ૧૧૦૮૭૨૨ જેટલા મતદારો જિલ્લામાં નોંધાયેલા છે.
આજે યોજાયેલા મતદાનમાં ૨૩૬૨ બેલેટ યુનિટ ૧૫૬૧ કંટ્રોલ યુનિટ અને ૧૭૫૮ વી.વી.પેટનો ઉપયોગ કરવામાં આવશે. ચૂંટણી સંદર્ભે જિલ્લામાં ૧૩૫ સેક્ટર રૂટ નક્કી કરવામાં આવ્યા છે અને રિઝર્વ સહિત કુલ ૧૫૦ સેક્ટરની નિમણૂક કરવામાં આવેલ છે. કુલ મતદાન મથકો ૧૩૨૩ પૈકી ૫૦ ટકા મતદાન મથકો ઉપર ૬૨૨ લાઈવ વેબકાસ્ટિંગ કરવામાં આવી રહ્યુ છે. તે માટે હિંમતનગર કલેકટર કચેરી પોળો હોલ ખાતે વેબકાસ્ટીંગ સુવિધા ઉપલબ્ધ કરીને સતત મોનીટરિંગ કરવામાં આવી રહ્યું છે.
ચાર વિધાનસભા મતવિસ્તારમાં સવારે ૮ કલાકથી મતદાનનો પ્રારંભ કરવામાં આવ્યો છે. સવારથી જ લોકોમાં મતદાન કરવા પ્રત્યેનો ઉત્સાહ જોવા મળી રહ્યો છે. કેટલાક મતદાન મથકોમાં લાંબી કતારો જોવા મળી રહી છે અને લોકો શાંતિપૂર્ણ વાતાવરણમાં મતદાન કરી રહ્યા છે.
વિધાનસભા સામાન્ય ચૂંટણી ૨૦૨૨ અંતર્ગત આજે યોજાયેલા મતદાન દિવસે સાબરકાંઠા જિલ્લા ચૂંટણી અધિકારી અને કલેક્ટરશ્રી હિતેષ કોયા(આઇ.એ.એસ) દ્વારા હિંમતનગર ત્રિવેણી વિધ્યાલય ખાતે આવેલા સખી મતદાન મથક નંબર ૭૪ માં સવારે ૧૧:૩૫ મિનિટે મતદાન કરી મતાધિકારનો ઉપયોગ કર્યો હતો. બપોરે ૧ વાગ્યા સુધીમાં સાબરકાંઠા જિલ્લામાં સરેરાશ ૩૯.૭૨ ટકા મતદાન નોંધાયુ હતુ. બપોર બાદ મતદાન મથકોમાં મતદાન કરવાનો ઉત્સાહ અને ઘસારો જોવા મળ્યો હતો.
સાબરકાંઠા જિલ્લામાં હિંમતનગરના વરરાજાએ લગ્નગ્રંથીમાં જોડાતા પહેલા હિંમત હાઇસ્કુલ મતદાન મથક ખાતે પોતાના મુલ્યવાન મતાધિકારનો ઉપયોગ કરી એક જાગૃત નાગરીક તરીકેની ફરજ અદા કરી તેમજ વિધ્યાનગરી હાઇસ્કુલ હિંમતનગર ખાતે ટ્રાન્સજેન્ડર સોનલમાસીએ મતદાન કરી તેમના મતાધિકારનો ઉપયોગ કર્યો હતો.
